دبلومة نظم المعلومات الجغرافية بجامعة المنوفية

يوجد دبلومة نظم المعلومات الجغرافية بكلية الاداب بجامعة المنوفية
ميعاد التقديم لدبلومة انتهي ولكن رئيس القسم موافق ان يبداء الدراسة بالدبلومة بشرط ان يكون عدد الطلبة لايقل عن خمسة
مدة الدراسة بالدبلومة سنتين السنة الواحدة تكلفتها 500 جنية ويمكن دفعهم علي قسطين كل قسط 265 جنية
وهي تقبل جميع الكليات والتخصصات حتي خريخي معاهد المساحة
ارجوا ممن يريد الالتحاق بالدبلومة مراسلتي

أتمنى لكم النجاح يا رب فى تجميع العدد الكافى

إيه رأيكم نجمع جهودنا على بعض بحيث ننضم لحاجه واحده عشان تقوم (هناك دبلومة فى الأسكندريه و التى أعلنت عنها هنا http://www.gisclub.net/vb/showthread.php?t=3507 و هناك دبلومتكم فى المنوفيه) ؟, مع العلم إن أنا أعلنت عن الدبلومه بتاعتكم دى هنا من قبل .. ليس لأنى داخل فيها (فظروفى صعب أبعد عن الأسكندريه فى الفتره دى إللى بمر بيها حاليا) و إنما من باب الامانه فى الرد على شخص سأل و من باب وضع المعلومات كلها أمامه عشان يختار ما يناسبه و ها هو الرابط لما كتبته عنها
http://www.gisclub.net/vb/showthread.php?t=3445&page=2

أخر معلوماتى (من كام يوم) عن دبلومة المنوفيه إن العدد فيها إتنين

منهج دبلومة المنوفيه فى السنه الأولى (حاسب آلي , صور جوية , خرائط , استخدام أرض , موارد طبيعية , مرئيات فضائية , إحصاء , بيئة)
أشعر إنه زى إللى يروح يتعلم القراءه و الكتابه (محو أميه) فيقوموا حاطين له منهج صحه و منهج دين و منهج تربيه و طنيه و منهج جغرافيا و تاريخ و ... رغم إنه جالهم فقط يطلب أن يتعلم حاجة محدده لكن ياخد حاجات تانيه يمكن هو مش عايزها و غير إسم الشهاده النهائيه إللى هيحصل عليها ..

فتلاقى فى الفصل الدراسى الاول بتاع دبلومة المنوفيه مادة حاسب ألى و ذكر عنوان الماده فى الدراسات العليا فى الجامعات المصريه كدا فقط حاسب ألى عادتا ما بيكون الويندوز و الوورد و الأكسل (هكذا الحال فى الماجستير فى الأسكندريه مثلا) أو لغة برمجه عتيقه مثل الفورتران أو خلافه

و تلاقى يدرسوا كمان مادة بيئه .. و البيئه دا تخصص لوحده يتاخد فيه بكالوريوس و يتعمل فيه دبلوم و ماجستير و دكتوراه فى البيئه لوحدها و إللى جاى يدرس نظم معلومات جغرافيه لو هيشتغل فى البيئه فهو هيكون جاى من خلفيه دارس فيها أصلا البيئه و جاى بس عشان يتعلم حتة نظم المعولمات الجغرافيه ... و لو مش هيشتغل فى البيئه فهى متهموش , و كل واحد ليه خلفيته و كل واحد يقدر يدرس طبيعة الإستعداد العلمى للعمل إللى هيقوم به و هو جاى فقط لكى يدرس حته نظم المعلومات الجغرافيه فقط و لا داعى لتضييع الساعات المعتمده فى دراسات من كل بستان زهره

كذلك مادة الإحصاء ... إللى دارس إحصاء فى خلفيته الجامعيه دارسها خلاص و إللى مش دارسها و يحب يشتغل فيها فيدرسها لوحده إنشاله ياخد فيها دبلومه .. ربنا يسهل له

أما عن مادة الخرائط فى دبلومة المنوفيه .. فالخرائط علم كبير تبلغ عدد مواده فى سنوات الليسانس ثمانية مواد فى الأسكندريه (خرائط طبوغرافيه , خرائط طقس و مناخ , خرائط اليه , خرائط كنتوريه , خرائط جيولوجيه , خرائط بحريه , مدخل لعلم الخرائط , مساقط الخرائط) إذا معنى كدا لما تيجى ماده واحده فلو هتجمع كل دا فهتكون ماده عامه شامله كإنها زي عناوين بس لكل واحد من الأنواع الثمانيه السابقين

إذا تبقى مواد الموارد الطبيعيه و إستخدام الأرض و الصور الجويه و المرئيات الفضائيه .. أنا مليش إعتراض عليهم و لكن تعالى الأن نقارن مع دبلومة الأسكندريه

أولا دبلومه الأسكندريه فى الخرائط .. دا عنوانها و هى نوعيه من الدراسه اعتبرها دراسه فى العلوم الثابته التى لا تتغير (و لن تتغير) سريعا مثل من يدرس الحاسب الألى و برامجه (تحت إسم نظم معلومات أو برمجه أو أى حاجه) فما ان ينتهى من دراسته حتى يكتشف إن ما درسه أصبح غير مواكب للتغير السريع و أن عليه أن يدرس الأحدث علمه و برامجه عامله زى السبرتو إن لم يكن هناك ممارسه بإستمرار على الجهاز تطير من العقل
مواد دبلومة الخرائط أولا فيها مواد تكميليه فى أسس الخرائط و أنواعها من سنوات الليسانس لمن هم من خلفيه علميه لم يدرسوا فيها الخرائط , و باقى المواد : قراءة وتحليل الخرائط والصور الجوية والمرئيات الفضائية تطبيقات الاستشعار عن بعد في الخرائط نظم المعلومات الخرائطية الاتصال الخرائطي مساحة مستوية مساحة طبوغرافية تصميم الخرائط مهارات فنية متقدمة في الخرائط و مواد أخرى
و كما ترين فإنها تحتوى على قراءة و تحليل الصور الجويه و المرئيات الفضائيه أيضا كما فى دبلومة المنوفيه
و أظن من يدرس دبلومة الخرائط فى الأسكندريه تمكنه من إنه ينضم إلى رابطه خريجى المساحه و الخرائط بالجامعات المصريه و ساعتها يقدر يختم ورق بطاقة الرقم القومى و يكتب فى المهنه أخصائى مساحه لو أراد
دبلومة الأسكندريه سنتين أيضا و كلها كورسات بينما فى المنوفيه السنه الثانيه برامج كمبيوتر عن نظم المعولمات الجغرافيه و مشروع و مادة مناهج بحث
الدراسه فى دبلومة الأسكندريه ساعات معتمده فنظريا ممكن واحد ياخد مواد فى الفصل الدراسى أكت من واحد و يخلص أسرع منه , بس معرفش الكلام دا هيسمحوا بتحققه عمليا أو لأ

لو كنتم من سكان محافظة المنوفيه , الدقهليه , ... فدبلومة المنوفيه فيها ميزه هامه جدا و هى إنها قرب سكنكم لكن إيه رأيكم لو مقامتش الدبلومه بتاعتكم لحد واحد يناير تنضموا لينا فى دبلومة الخرائط فى الأسكندريه عشان العدد يكمل ؟ لو هتقدمى فى الأسكندريه إنتى و من معكى بتوع المنوفيه أقدر أساعدكم فى التقديم هنا فى الأسكندريه
فى إنتظار ردك

تحياتى و ربنا يوفقنا كلنا

شكرااستاذ حاتم علي الرد

بالنسبة الي دبلومة المنوفية فهي افضل لي علي حدود علمي لاسباب
1 انها ديلومة في نظم المعلومات الجغرافية وهذا ما اريدة الان
2 انها قريبة من سكني
3 ان تكلفتها اقل من الاسكندرية وكذلك عين شمس

ارجو من حضرتك اذاكان لديك معرفة بالاشخاص الذين يريدون التقديم فيها معرفتى بهم وذلك حتي يكتمل العدد

هل شهاده الدبلومة بالمنوفية معتمدة داخل مصر وخارجها لان احد الزملاء قال لن تفيدك بشئ مع العلم انني اعمل في مجال نظم المعلومات الجغرافية واستفادتي من هذة الدبلومة شهادة اكثر منها علم لاني دارسة gis وعلي مااعتقد انني ارتفعت خطوة فى نظم المعلومات الجغرافية
وشكرا علي الرد وارجوا منك مساعدتي

أتمنى لكى التوفيق
عن سؤالك هل هى معترف بها أم لا
فإن كنتى تقصدى الجامعات الحكوميه و الجهات الحكوميه فهى كشهاده من جامعه مصريه تتبع المجلس الاعلى للجامعات و لم تنشأ إلا بعد موافقته فطبعا ستكون معترف بها فى باقى الجامعات الحكوميه و لو يشترطوا الحصول عليها لتكملى دراسة ماجستير عندهم فشهادتها تنفع و لو هناك علاوه تحصلى عليها فى عملك الحكومى لو حصلتى عليها فستلتزم الجهه الحكوميه بإعطائك تلك العلاوه عند حصولك على تلك الدبلومه
أما لو تقصدى القطاع الخاص و عيون الأفراد فدا يرجع لنظرة كل إنسان و خبراته الشخصيه فمثلا شركة شلمبرجير لا تعترف إلا بأربع جامعات فى مصر (القاهره و عين شمس و الأسكندريه و الجامعه الامريكيه) و غير كدا يعينوه و لكن على درجه أقل , و على المستوى الشخصى أنا أصطدمت بمستويات علميه مرعبه فى الضعف العلمى من خريجى جامعات الأقاليم (و طلاب الأقاليم حتى لو كانوا متخرجين من الأسكندريه) و كذلك يحدث فى العرب و لن انسى ما حييت موقف علمى صاعق فى الضعف مع دكتور عراقى حصل على الدكتوراه من إنجلترا و كان يشغل منصب علمى كبير فى جامعة بغداد و لكن كان مثله مثل طالب الأقاليم فى مصر الذى يذهب ليدرس فى العاصمه أو الأسكندريه (و على فكره جامعة حلوان شهدت فيها ما جعلنى أصل أسفا لإعتبارها ضمن مستوى جامعات الأقاليم) .. هذا ما أعرفه و عن رأيي الشخصى و تجربتى و من الزاوية التى عاينتها فى تخصصى العلمى
فى رأيي الإعتراف الأهم هو إعترافنا أمام أنفسنا و أن ننام مرتاحى البال و الضمير و راضين عن ما انجزناه و أهدرنا و قتنا فيه و ألا نفقد إحترامنا لأنفسنا عن قيمه حقيقيه نعلمها لمستوانا العلمى و الشهاده التى حصلنا عليها نحتفظ بها فى الخفاء و لا نعلنها للناس .. لذا أريد فى الشهاده التى أحصل عليها أن أكون حصلت عليها عن علم حقيقى و أن أكون إذددت علما (قدر الإمكان) بمقدار العمر الذى سأمضيه فى تلك الدراسه و لأكون صريح مع نفسى
و مره أخرى تمنياتى لكى بالتوفيق

شكرا علي الرد استاذ حاتم
بالنسبة للاشخاص الذين يريدوا الالتحاق بالدبلومة هل تعرفهم اريد تجميع العدد
وما هي مصاريف دبلومة الخرائط
ممكن تساعدني في تجميع العدد

هل تقبل الالتحاق بنظام التعليم من بعد اى احضر فقط الامتحانات الانى اعمل فى الخارج

على بركة الله ونتمنى التوفيق

لا أعرف شخص يريد الإلتحاق بدبلومة المنوفيه
مصاريف دبلوم الخرائط فى كلية الأداب جامعة الأسكندريه للمصريين كالأتى :
الساعه المعتمده بأربعين جنيه , و لأن كل ماده عباره عن ساعتين معتمدتين فيكون تمنها تمانين جنيه
70 جنيه دليل
32 جنيه مصاريف أخرى
و بس على كدا
الدفع كل فصل دراسى يتم دفع مواده على حدى فى وقته يعنى مثلا لو شخص هياخدها كلها على ثلاث فصول دراسيه كل فصل خمس مواد (لأنهم خمسة عشر ماده) و بإعتبار إن خلفيته العلميه مخلتش عليكه مواد تكميليه , إذا هبدفع فى الترم الأول (80 * 5 + 70 + 32) = 502 جنيه ثم الترم الثانى 400 و الترم الثالث 400 و هكذا تقدرى تحسبيها لو ترم مكون من 2 أو 3 أو 4 أو .... مواد فكم تبلغ مصاريفه و أعتقد إن ال 70 و ال 32 جنيه تندفع مره واحده فى الترم الأول فقط
و تصبح كلها أول عن أخر 1302 جنيه (أما لو عليه مواد تكميليه فتنضاف ثمنها) تتقسم على سنه و نص , سنتين سنتين و نص تلاته بحسب ما هتاخديها
و للتأكد يمكن الإتصال برقم الكليه 4875735 و طبعا 03 عشان محافظة الأسكندريه فى الأول هيرد السوتش فتطلبى أن يحولك على مكتب الدراسات العليا
و هناك مصاريف المواصلات (عشرين جنيه بأسعار اليوم رايح جاى فى الاتوبيس او البيجو لشخص من المنوفيه) و المواصلات الداخليه و تصوير الورق و الأكل

و على بركة الله فى أى دراسه تدخلى فيها

بصراحة لقد قدمتم لي فكرة كاملة من خلال مناقشتكم عن دراسة نظم المعلومات الجغرافية في مصر، ولكن عندي ملاحظة أن محتويات هذه الدبلومات لا تجعلها متميزة وخاصة بنظم المعلومات الجغرافية، وبصراحة أكثر اعتقد أن فيها كل شئ ما عدا نظم المعلومات الجغرافية.

أهلا بالأستاذ عبد الناصر المصرى

فى الأسكندريه الدبلومه خرائط و ليست نظم معلومات جغرافيه و إن كانت تتطرق ليها فقط من خلال إيقاعها على الخرائط
و لمعلوماتك هناك دبلومه فى عين شمس لم نتطرق ليها و هناك دبلومه فى معهد الدراسات العليا و البحوث فى الأسكندريه و ستبدأ على تقديمة أغسطس القادم ... كما أن كل أقسام البيئه فى العلوم و الجغرافيا فى الأداب و ربما كذلك فى كليات المعلومات و الحاسبات و الهندسه ... مهيئه أن يكون عندها دبلومه "فى" أو متعلقه "ب" نظم المعلومات الجغرافيه سواء معروضه حاليا و لا نعرفها أو فى أى سنه تولد و تبدأ العمل

تحياتى

أشكرك على تفاعلك السريع يا أخي حاتم - أسمح لي ان أناديك بأخي - ولكن ماذا عمن يرغب في دراسة نظم المعلومات الجغرافية بصورة محضة أو الأستشعار من بعد، لم أجد في الدبلومات الأثنتين والثالثة في عين شمس ما يوافق رغباتي. أتمنى لو تستطيع أو يستطيع أحد من أخواننا أن يستطيع المساعدة، ويكون له جزيل الشكر لو أن هذه الدراسة في مصر أو الأردن.

أحب حكاية الصوره المحضه دى
أنا كمان من عشاق الدراسه بالصوره المحضه فى التخصص إللى طالبه و بس و بحريتى و محبش أخد شهاده فى إسم و معبيه تحت منها كورسات من مليون إسم
ليس لدى معلومات لأساعدك و عليك بالبحث فى الإنترنت أو طلب المساعده من غيرى
أنا تركيزى فى دبلومة الأسكندريه لو تحب تشرفنا
و أطيب المنى

من يريد الالتحاق بدبلومة نظم المعلومات الجغرافية بجامعة المنوفية

يرسلني نرجوا اكمال العدد

شكرا للجميع علي الاهتمام بالموضوع

بالنسبة للاخ ابراهيم فالحقيقة لااعرف انة يوجد بهذا النظام ام لا ولكن ماعرفة ان القسم متعاون جدا ويريد فتح هذة الدبلومة فمثلا كانت مشكلتي هى ميعاد المحاضرات فعندما كلمت رئيس القسم قال لايوجد مشكلة ممكن تكون المحاضرات ايام الجمعة والسبت والميعاد الناسب لكم لا يوجد مشكلة في المواعيد
جميع من يقدم في هذة الدبلومة ناس كبار وكلنا نعمل واصحاب بيوب عرفين مصلحتهم كويس واكيد الدكاترة عرفة كيدة وسوف يراعوا ذلك واكيد عندما يعرفوا انك مسافر وظروف العمل لاتسمح الابحضور الامتحان
اكيد لااحد سوف يمانع مادومت سوف تحضر المتحان والفيصل هو النتيجة وياحبذا لوحضرت كم محاضرة قبل الامتحان
ووعد مني يااخ ابراهيم ان جميع المحاضرات والكتب سوف ارسلهالك اول باول وسوف اساعدك بكل ما اقدر

اتمني ان تنضم الي هذة الدبلومة ويكتمل العدد

والله العظيم لو ينفع هكون واحد معكم والف شكر على الرد على سؤالى اخت منى عبد التواب

حوار مفيد جدا جدا بين الخت منى والأخ حاتم

بارك الله فيكما وموفقين ان شاء الله

والمنوفية والاسكندرية مدرستان عملاقتان وسوف تكون الدبلومة فى أى منهما مفيدة بإذن الله ..... وأتمنى أن يكتمل أعداد المجموعات فى الكليتين وأن تنهض اقسام الجغرافيا خصوصا ان الكليتين بهما فطاحل الجغرافيا ...


أشكركم

السلام عليكم